Nagpahayag nin labi na pagdadalamhati an lider kan Simbahang Katolika na si Pope Leo XIV sa kasuarin sanang pag-atake kan Israel sa sarong simbahan sa Gaza asin nag-apelar sa tulos na pagwawakas kan pig-apod kaining “barbarity” o kalupitan sa giyera sa Gaza.
Kasuarin sana tinamaan an sarong Holy Family church na nagin rason kan pagkagadan kan tolong indibidwal gikan sa pigkakarkulong 600 Gazans na nakakanlong duman asin irido man an iba pa, kaibahan an mismong kura paroko na si Fr. Gabriel Romanelli.
Kan nakalihis na domingo makalihis an pagpangadyi kan Angelus prayer sa saiyang summer residence sa Castel Gandolfo, pinangaranan asin ipinagpangadyi kan banal na Santo Papa an tolong biktima na sinda Saad Issa Kostandi Salameh, Foumia Issa Latif Ayyad, asin Najwa Ibrahim Latif Abu Daoud na harani soboot sa saiya asin saindang pamilya.
Pigtawan-duon man kan Santo Papa na an nasambitan ng pag-atake an saro sana sa padagos na military attacks kontra sa mga sibilyang mamamayan asin mga lugar kan simbahan sa Gaza.
Katakod kaini, liwat na nag-apelar an Holy Father para sa matoninong na pagresolbar sa labanan.
Pig-enkaminar man kan Santo Papa an international community na pairalon an humanitarian law asin irespeto an obligasyong protehiran an mga sibilyan siring man an pagbabawal sa kolektibong pagpapadusa, asin an indiscriminate use of force asin an pwersahang pagpapahali sa mga mamamayan.
Tinapos ni Pope Leo an saiyang apelar sa paagi kan pagtatao nin mensahe sa Christian communities sa Middle East, na saiyang nasasabutan na sadit sana an saindang magigibo sa hampang kan dipisil na sitwasyon ngunyan asin pinasalamatan an mga ini sa saindang pagigin saksi sa pananampalataya.
Sa ngunyan, nag-abot na sa labi 2 milyong mamamayan sa Gaza an na-displace huli sa giyera na nasa ika-22 na bulan na.
