NAGA CITY- Piglinaw kan DTI-Camarines Sur na dae magkakaigwa nin price freeze sa manlaen-laen na produkto sa probinsiya nin Camarines sur katakod kan naeksperyensiyahan na raot kan panahon.
Sigun ki Jay Percival Ablan, Provincial Director kan DTI-Camarines Sur mayong paiiralon na price freeze nin huli ta mayo man deklarasyon nin state of calamity sa probinsiya.
Dugang pa kaini, mayo man deklarasyon an mga alkalde, Gobernador o magin an Presidente kan nasyon.
Alagad kasabay man digde, liwat na pigtawan duon kan opisyal na igwang inaapod na Local Price Monitoring Council an probinsiya na iyong responsable sa pagmonitor, pagsierto na igwang bastanteng produkto asin nagsusunod sa pigtalaan na presyo an mga paratienda.
Apwera digde, yaon man soboot an saindang ahensiya na preparadong magsimbag sa mga kahaputan kan mga consumer.
Mientrastanto, pigsierto man ni Ablan na mayong risk sa paglangkaw nin presyo maski nakaeskperyensiya nin raot kan panahon huli ta marhay man soboot an suplay kan mga produkto.
Sa ngunyan, pinayuhan na sana kan opisyal an publiko na sa panahon kan kasiributan siring kan kalamidad, magin kalmado asin girumdumon an mga salbadong paagi sa pagbakal nin mga produkto.
