NAGA CITY – Pigtawan-duon kan sarong kongresista na igwang dakulang epekto an political dynasty sa nasyon. Sa entrevista kan Bombo Radyo Naga ki Cong. Reene Co kan Kabataan Partylist, sinaysay kaini na kaipuhan soboot maintindihan an nagin negatibong kahulugan kan politika, huli man ta enot na enot bako man maraot an politika, kun saen dapat pano ini nagagamit sa ikakamarhay kan lambang Pilipino.
Dugang pa kaini, igwang mas politikal na kapangyarihan an mas kadakol na mga Pilipino.
Sigun pa sa kongresista, an masakit sana digde kun igwang mga mayayamang pamilya na naghahanap nin paagi tanganing monopolyohon an kapangyarihang politikal na para sa sainda sana kun saen ini an nangyayari sa kadakol na parte kan nasyon orog na sa mga probinsiya na nagigin rason man kun tano kadakol na proyekto asin mga serbisyo na dae nailulunsar huli ta igwang mga dinastiya na pig-eenot an saindang sadiring interes kaysa sa proyekto.
Kaya saro man soboot sa practice kan nasambitan ng Partylist an dae pag-ako kan pork barrel, confidential funds, intelligence funds, asin an manlaen-laen na paagi na nagigin discretionary an paggamit kan pondo, magin an dae pagigin transparent sa paggamit kaini.
Mientrastanto, sinaysay pa ni Co na an anuman na proyekto na planong isagibo sa sarong lugar an dae dapat nakadepende sa mga namamayo siring kan alkalde, congressman, magin gobernador, bagkus huli man ta ini an pangapodan kan mga mamamayang Pilipino an siring na istruktura dapat igwa ining plano asin laanan nin pondo.
Kaya sa ngunyan na papaabuton na soboot an Barangay asin Sangguniang Kabataan Eleksiyon, pangapodan kaini sa mga dae parte kan dinastiya asin nagtutubod sa pangangaipuhan kan mga Pilipino asin sa totoong pampublikong serbisyo, siring man kayang magsakripisyo nin oras, asin panahon, magdalagan soboot asin magin parte kan totoong pagtabang sa nasasakupan.
