Bilog na suporta an itinao ni Department of Education Secretary Sonny Angara na resolbaran an haloy nang kakulangan sa mga classrooms sa nasyon sa paagi kan mga aktibong pakikipagtabangan sa pribadong sektor sa irarom kan Public-Private Partnerships (PPP) alinsunod na man sa naging patara-tara kan presidente sa saiyang ika-apat na SONA.
Sinaysay ni Angara na presenteng nakikipagtabangan an ahensiya sa mga private partners tanganing maparekas an pagpapatindog kan mga bagong silid-aralan.
Dugang pa kaini na sa nakalihis na taon, nasa 6,000 classrooms sana kada taon an naipatindog kan gobyerno.
Alagad sa irarom kan PPP model, pwedeng makapagpatindog nin labi 100,000 classrooms sa laog kan lima hasta sampulong taon.
Apwera sa imprastraktura, sinaysay man ni Angara an pangangaipuhan na baguhon an direksiyon kan edukasyon tanganing magin tugma ini sa mga trabahong dara kan teknolohiya asin Artificial Intelligence (AI).
Kaibahan sa mga inisyatiba an pagpapauton kan “TechPro” track para sa Senior High School, katuwang an TESDA, CHED, asin DOLE tanganing matawan an kajovenan nin mas kadakol na oportunidad sa trabaho siring kan graphic design asin electrical work.
