Pigpauktaba kan American singer na si Stevie Nicks an pagkundusir kan saiyang mga konsiyerto.
Sa social media account kan singer, pigheras kaini an pagkakaigwa nin fracture kan saiyang abaga.
Huli digde, nagdesisyon ining ipauktaba an mga show sa presenteng bulan kan Agosto hasta Setyembre.
Paliwanag ni Nicks, an show kaini sa Oktubre an dae apektado kun saen kaipuhan sanang magparahay nin pirang bulan.
Mientrastanto, an mga apektadong tickets an sainda pa man giraray na bibistuhon enkaso igwang bagong schedule kan show.
Marurumduman, nabisto an singer komo miyembro kan bandang Fleetwood Mac kun saen nagkapira sa mga sonatang pinasikat kan banda iyo an Dreams, Everywhere asin kadakol pang iba.
Sa ngunyan, hagad kaini an pag-intindi kan saiyang mga fans asin pigsierto na maparahay nin marhay tanganing tolos na makabweltada sa pag perform.
