NAGA CITY- Mapakol sa labi 142,000 na rice farmers sa Rehiyong Bicol an mabebenipisyaran sa nagin desisyon ni Presidente Ferdinand R. Marcos Jr. sa temporaryong pagsuspender kan rice importation sa laog nin 60 aldaw puon September 1, sigun sa Department of Agriculture Bicol.
Sigun ki Jayson Gonzales, assistant agricultural program coordinating officer kan DA-5, an mga paraoma sa Bicol Region an posibleng makipagnegosasyon para sa halangkaw na farmgate prices sa pagpuon kan aranihan.
Ini an igwang positibong epekto sa mga paraoma orog na ta mayo sindang kakahampangon na kompetisyon gikan sa mga imported rice.
Pigsaysay man ni Lovella Guarin, tagapagtaram kan DA an inisyatiba na ini an positibong lakdang partikular sa bulan kan Setyembre na pigmirar komo harvest season sa wet cropping period.
Dugang pa ni Guarin, naabot na kan Bicol Region an achieved rice sufficiency kun saen kan nakalihis na taong 2024.
Mientrastanto, an Bicol Region an kabali sa mga high rice regions asin igwang bastanteng rice production.
Enot naman na pigsaysay kan opisyal na nagtao an ahensiya nin nasa P7,000 komo pinansyal na asistensiya sa mga paraoma na panalmingan sa suporta ni Presidente Marcos sa mga paraoma asin sektor kan agrikultura.
