Nagpapadagos an piggigibong lakdang kan pamayuhan kan Barangay Igualdad, Naga City tanganing mamanehar an saindang basura.
Sa entrevista kan Bombo Radyo Naga ki Angelo Romano Bendiola, Barangay Kapitan kan nasambitan ng lugar, sinaysay kaini na naipasar na sa saindang lugar an ordinansa na pig-aapod na Basura mo, Isako mo na saro sa mga nahihiling na paagi tanganing mamantinir an kalinigan sa saindang lugar.
Apwera digde, igwa man sindang pigtatao na cash prizes sa mga zona na pinakamalinig kun saen an pigmirar komo Most cleanest zone an makakareseber nin P10-K, sa First runner up man makakareseber nin P7-K mantang P5-K sa Second Prize asin P2-K na consolization price para sa iba.
Obheto soboot kan nasambitan ng programa na mas orog pang enkaminaron an saindang mga residentes na makisumaro sa paglinig kan saindang barangay orog na ta mayo man daog pag-abot sa paglinig kan kapalibutan.
Mientrastanto, pigsaysay pa ni Bendiola na kada semana nagkakaigwa sinda nin paglilinig sa saindang area komo pagsunod naman sa kasuguan kan DILG.
Kabali na an clearing kan mga debris, kahoy, sako kan basura asin iba pa.
Sa ngunyan, hagad na sana kaini an kooperasyon kan publiko para sa pagmantinir kan kalinigan sa saindang lugar.
