Pig-ako ni Department of Public Works and Highways (DPWH) Secretary Manuel Bonoan na igwang mga ghost projects sa nagkapirang distrito sa Bulacan.
Sa imbestigasyon kan Senate Blue Ribbon Committee, na hot-seat ni Senate President Pro Tempore Jinggoy Estrada si Bonoan nin huli ta garo soboot igwang ghost projects sa Calumpit, Malolos, asin Hagonoy.
An kontratista kan mga “ghost” flood control projects sa Bulacan an Wawao Builders saro sa 15 kontratistang pigsambit ni Presidente Bongbong Marcos na nakakua kan kadaklan sa mga flood control contracts kan gobierno.
Sa Bulacan sana igwang 85 proyekto an Wawao Builders na nagkakantedad nin P5-B asin kabilugang P9-B man sa bilog na nasyon.
Pigsierto man ni Bonoan na maninimbag an gabos kan imbwelto sa anomalya kun mapatotohan an mga ghost flood control projects.
Mientrastanto, pinasa-subpoena na man ni Estrada an may-sadiri kan Wawao Builders na si Mark Allan Arevalo para sa masusing imbestigasyon kan komite.
