Pinagkukomento ngunyan kan Kataastaasang Hukuman an mga ‘respondents’ sa ipigsunad na petisyon ni Atty. Romulo Macalintal mapadapit sa postponement kan Barangay asin Sangguniang Kabataan Elections 2025.
Sa ipinadarang mensahe ni Supreme Court Spokesperson Atty. Camille Sue Mae Ting, saiyang ipigheras na pigsugo kan Korte Suprema an Senado, House of Representatives, Executive Secretary Lucas P. Bersamin, asin Commission on Elections na magkomento dapit sa petisyon.
An nasambitan ng kasuguan kan Korte Suprema an kasunod sa isinagibong En Banc session kaini kun saen pinag-ulayan an petisyon partikularmente sa G.R. No. E-02002.
Marurumdumang ipigsunad ni Atty. Romulo Macalintal an nasambitan ng petisyon tanganing kwestiyunon an pinirmahang ley ni Presidente Ferdinand ‘Bongbong’ Marcos Jr. rason tanganing dae madagos ngunyan na taon an eleksiyon o BSKE 2025.
Hagad kaini sa saiyang petisyon na magawadan asin pagbigyan kan Korte Suprema na mag-isyu ini nin Temporary Restraining Order o TRO tanganing pugolan an pagpapauktaba sa eleksiyon.
Pigtawan an mga respondents nin dae mahaloy sa sampulong aldaw tanganing iheras an saindang komento sa Korte Suprema.
