NAGA CITY- Padagos na pigsisimbagan kan lokal na gobierno kan siyudad nin Naga an mga reklamo na pigpapabot kan mga magurang kan mga atleta dapit sa bakong marhay na pasilidad na ginagamit kan saindang mga kaakian.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na tolos soboot ining nagpadara nin mga personahe sa pigrereklamong pasilidad tanganing mahiling an totoong kamugtakan kaini.
Digde na napag-araman gikan sa video na ipinadara sa alkalde an bakong marhay na kamugtakan kan banyo.
Sigun ki Robredo, makasupog na siring kaini an banyo na ginagamit kan mga atleta na mayong kaayusan asin nakakaapektar sa saindang training.
Huli digde, nakiulay an alkalde sa mga nanunugdan na pakarhayon man an nasambitan ng mga pasilidad tanganing makatabang sa mga atleta na makapokus sa saindang ensayo siringman malikayan an anupaman na pwedeng magbungkaras na problema.
Dae soboot pwede na makasupog an mga sports facility na ginagamit kan mga atleta partikular an mga banyo nin huli ta kaipuhan ibusol an marhay na kalinigan sa lugar.
Mientrastanto, pigsaysay man ni Robredo na kamawotan kaini an tolos na pagpuon kan pagpakarhay sa Pacol Sports Complex tanganing tolos man na magamit kan mga atleta.
Sa ngunyan, pigsierto na sana kaini na yaon an saindang paglalapigot sa tabang kan magkakanigong opisina sa pagsimbag kan nagbubungkaras na problema sa siyudad nin Naga.
