Suportado ni Speaker Ferdinand Martin G. Romualdez an paghihingowan kan Department of Information and Communication Technology (DICT) na maabot an 100 porsyentong Internet connectivity para sa gabos kan pampublikong eskwelahan sa bilog na nasyon antes makalihis an 2025.
Sinaysay ni Speaker Romualdez na importante an pagkakaigwa nin internet connection kan mga pampublikong eskwelahan sa pagsasarado nin digital gap asin maabot an tranpormasyon kan sektor kan edukasyon alinsunod sa vision ni Presidente Ferdinand “Bongbong” R. Marcos Jr.
Ginibo kaini an pahayag makalihis na ihayag ni DICT Secretary Henry Rhoel Aguda na 78 porsyento kan mga pampublikong eskwelahan an nakakonektar na sa Internet, alagad igwang pigkakarkulong 12,000 pampublikong eskwelahan, kadaklan an nasa geographically isolated asin disadvantaged areas, na mayo pang access.
Sa saiyang patara-tara sa Philippine Chamber of Commerce and Industry sa Makati City kasuarin sana, sinaysay ni Aguda na determinado an gobyerno na palawigon an sakop kan National Fiber Backbone (NFB) project na pigkakarkulong makikinabang an poco mas o menos 17 milyong Pilipino.
Pigtawan-duon ni Romualdez na lampas sa ulayang teknolohiya an inisyatibang ini, huli man ta parte ini kan pangitain kan Presidente para sa sarong digital asin inklusibong Pilipinas kun saen an pagigin konektado an nagbubukas nin pintuan sa dekalidad na edukasyon, mas pakarhay na serbisyong pampubliko, asin mas mahewas na oportunidad pang-ekonomiya.
Liwat pigsierto ni Speaker Romualdez an saiyang bilog na suporta sa pangitain ni Presidente Marcos para sa sarong tunay na online asin digital na Pilipinas.
Binanggit kaini na mismo an Presidente, sa saiyang State of the Nation Address (SONA) kan nakalihis na Hulyo, naglatag nin mga lakdang an gobyerno tanganing pahewason an Internet access sa paagi kan pagpapahewas kan NFB project, pagbubugtak nin dugang na libreng Wi-Fi sports, pagheras nin SIM cards na igwang libreng data sa mga hararayong eskwelahan, asin pagpapatindog nin mas kadakol pang cell cites.
Sa irarom kan prosopwestong pondo kan DICT, ₱5 bilyon an inilaan para sa pagpapautob nin Free Public Internet Access Program na nakapagpatindog na nin 18,849 sites sa bilog na nasyon.
Gagamiton ini tangang pondohan an backbone, middle mile, asin last mile ICT infrastructure, siring man an pagpapatindog nin towers, data centers, assets, asin iba pa na kukuohon gikan sa Spectrum Users Fee na pigkokolektar kan National Telecommunications Commission.
Tanganing labi na mapakusog an digital transformation sa mga eskwelahan, piglaan an P16.5 bilyon para sa Computerization Program kan Department of Education para sa 2026.
Sigun sa Leyte lawmaker saro sa leksiyon gikan sa COVID-19 pandemic iyo an importansiya kan Internet connectivity na dae na soboot maikokonsiderar na luho kundi sarong primerong pangangaipuhan tanganing maibusol an edukasyon sa gabos kan lebel.
Pig-enkaminar kaini an mga ahensiya kan gobyerno na maghingowa na makahabol sa pagpapamarhay kan Internet connectivity sa paagi kan pagpapalakaw kan NFB project.
Nangapodan man ini sa mga telecommunications company na ipagpadagos an suporta sa mga inisyatiba kan gobyerno tanganing mapamarhay an Internet access asin mapaabot ini sa mga liblib na lugar.
