Pigkokonsiderar kan Australian Defence Force (ADF) komo dakulang oportunidad an kakatapos na Alon Exercises 2025 tanganing mapamarhay an kapabilidad asin koneksiyon kaini sa Armed Forces of the Philippines.
Sigun ki Australian Deputy Theater Commander, MGen. Paul Kenny, nagkaigwa nin pagkakataon an ADF tanganing maaraman an mga sektor sa military alliance kan duwang nasyon na nangangaipuhan pang linangon.
Sa 2025 simulation, nagibo soboot kan duwang militar na palawigon an sakop kan simulation puon kan naenot kaining pagsasanay kan taong-2023.
Kaibahan digde an deployment kan ADF Joint Task Force Headquarters sa Philippines tanganing direktang magkaigwa nin connection sa Western Command Headquarters kan AFP sa Palawan.
Ini an enot na pagkakataon na ini nangyari.Sigun sa 2-Star Australian general, pigkokonsiderar kan ADF na magayong pagkakataon an nasambitan ng simulation tanganing mapatatag an relasyon kaini sa Pilipinas sa ibong kan dakulang distansiya sa tahaw kan duwang nasyon.
Para ki AFP Education, Training and Doctrine Command Commander, Major General Francisco F. Lorenzo Jr. sarong dakulang huma sa ginibong simulation an paghahanay asin synchronization sa hiro kan duwang militar.Ini soboot an nagpapasakit sa execution kan lambang military activity, sa tahaw kan pagmamawot nindang magkaigwa nin marhay na resulta sa simulation.
Para ki MGen. Kenny, dakulang huma man an paburo-bagong weather system sa nasyon, orog na sa western seaboard, kun saen primerong isinagibo an Alon 2025.
Siring man, pighurot kan Australian general na nagibo nindang hampangon an lambang huma asin mapagtrayumpohan an nagkapirang aldaw na military exercises.
An 2025 Alon an pinadakulang military exercise sa tahaw kan Pilipinas asin Australia na magsentro sa amphibious operations, naval and air interoperability drills, maritime security operations, asin combined live-fire exercises na isinagibo sa manlaen-laen na lokasyon siring kan Palawan, Nueva Ecija, asin mga katubidang sakop kan WPS.
