Mayong untok an ginigibong paghahanap nin mga otoridad sa mga natahuban kan mga nagrasay na edificio asin harong makalihis an pagtama kan magnitude 6 na linog sa Afghanistan.
Kadakol na mga lugadang biktima an dinara na sa mga ospital.Nangapudan man an United Nationsl High Commissioner for Refugees (UNHCR) sa mga nasyon na tolos na magpadara nin tabang.
Nagpadara na man nin mga personahe an Islamic Relief mula sa United Kingdom tanganing magtabang sa paghahanap kan mga nawawara huli sa linog.
Dae pa masierto ngunyan kan International Federation of the Red Cross asin Red Crescent Societies (IFRC) kun pira an kabilugang danyos sa nasambitan ng linog sa Eastern Afghanistan. Dakulang angat man sa mga rescuers an pag-abot kan bangi siringman an mga padagos na naeeksperyensiyahan na aftershocks.
Nagpadara na man nin tabang an UN World Food Programme (WFP) para sa mga biktima kan linog.
Piglalaoman kan mga otoridad na malangkaw pa an numero kan mga binawian nin buhay kun saen sa inisyal an nasa labi 800 na asin igwang haros 3,000 an nalugadan.
Mientrastanto, nagtagama naman an Afghan government nin $1.46 milyon komo tabang sa gabos kan mga nakasalbar sa linog.
