Kinondenar kan Catholic Bishops’ Conference of the Philippines (CBCP) an korapsyon sa flood control projects asin nangapudan na ibalik an pondong hinabon gikan sa mga nagbabayad nin buwis.
Sa saindang pastoral letter, sa pangengenot ni CBCP president asin Cardinal Pablo Virgilio David, dapit sa anomalya sa flood-control projects, pighurot kaini an pagtatatag nin sarong independent probe sa mga budget insertions asin public works projects.
Nangapudan man ini nin panibimbagan bakos sana sa mga kontraktor kundi pati na man sa mga lehislador, engineers, auditor, asin financier na parte kan sarong tinukoy nindang “multi-layered” na sistema kan katiwalian.
Umapelar man si David sa mga Pilipino, orog na sa kajovenan, na gampanan an mas dakulang papel sa paglaban sa korapsyon asin man gamiton an digital platforms tangani ibusol an paninimbagan sa lipunan.
Importante an papel kan kajovenan sa pagbabalik kan integridad sa pampublikong pamumuhay.
An korapsyon sa public works an haraning konektado sa kapobrehan huli ta bilyun-bilyong pondo an nawawara sa serbisyong panlipunan. Dakula soboot an napupuli sa kickbacks asin man komisyon, rason tangani magtinir na maluya asin man substandard an mga imprastraktura sa kadakol na komunidad.
Aminado man si David sa kakulangan kan Simbahan, na an katrangkiluhan asin dae pagkakapare-pareho kan mga saksi an minsang nagpapaluya man sa moral na tinig kaini.
Inilatag man kan pahayag an siyam na konkretong lakdang pasiring sa pagbabago, kabali na an pagbabantay, pagtakwil sa patronage politics, asin man pagpapahiling nin katapatan sa pang-uru-aldaw na buhay gikan sa pamilya hasta sa komunidad.
Pig-inkaminar man an pagbibilog nin “communities of truth” kontra sa disinformation, asin an mas aktibong pakikisumaro kan simbahan asin mga kahimnawa sa mga kilusan para sa marahay na pamamayo asin man katarungang pang-ekolohiya.
Nangapudan man si David nin masusing imbestigasyon sa flood-control projects asin pagsusunad nin kasong kriminal kontra sa mga imbwelto sa darakulang panghahabon.
Hurot kaini, dapat pangenutan kan mga diyosesis asin parokya an transparency asin accountability, asin pig inkaminar an mga lider sa gobyerno, negosyo, asin simbahan na mamuhay nin simple asin talikudan an labing luho.
