Nagsakat an numero kan mga Pilipinong mayong trabaho kan nakalihis na Hulyo kan presenteng taon.
Sa sarong pulong balitaan ngunyan na aldaw nin Miyerkules, Setyembre 10, ipigreport ni Philippine Statistics Authority (PSA) chief USec. Dennis Mapa na puon 1.95 million kan nakalihis na Hunyo, naglangkaw sa 2.95 million kan nakalihis na Hulyo an mga indibidwal na edad 15-anyos pataas na mayong trabaho.
Ini an nagpapahiling kan paglangkaw kan unemployment rate kan nakalihis na Hulyo sa 5.3% gikan sa 3.7% kan nakalihis na Hunyo.
Boot sabihon kaini na 53 gikan sa 1,000 indibidwal an mayong trabaho o kabuhayan sa nasambitan ng panahon.
Ipinaliwanag kan PSA Chief na nagkapira sa mga rason kan pagbaba kan partisipasyon sa labor force o pagbaba kan igwang trabaho iyo an huli sa pagtama kan mga bagyo sa nasyon kan nakalihis na bulan nin Hulyo.
Partikularmente na naapektaran digde iyo an sektor kan agrikultura, construction, fishing, asin iba pa.
Mientrastanto, naglangkaw man an year-on-year unemployment huli sa schooling, household family duties, naghahalat sa saindang inaplayang trabaho asin sa epekto na man kan maraot na panahon.
