Iniluwas na kan Palasyo kan Malacañang an Executive Order 94 dapit sa pagbilog nin Independent Commission for Infrastructure o ICI.An Executive Order number 94 an pinirmahan ni Presidente Ferdinand Marcos Jr kasuodma, September 11, 2025.
Binilog an Independent Commission tanganing imbestigaran an mga iregularidad asin korapsiyon sa mga flood control asin iba pang infrastructure projects kan gobyerno sa laog kan nakalihis na sampulong taon.
An fact-finding commission an pigbibilog kan tolong miyembro, sarong chairperson asin duwang miyembro na igwang matibay na reptuasyon pag-abot sa integridad asin pagigin patas.
Igwang kapangyarihan an ICI na magsagibo nin imbestigasyon, magluwas nin subpoena, mangalap nin ebidensiya, asin irekomedar an pagsusunad nin kaso kontra sa mga imbwelto sa anomalya, opisyal man kan gobyerno o pribadong indibidwal.
Prayoridad kan komisyon an mga proyekto kan flood control, orog na ta kadakol na mga report kan misuse of funds asin irregularities sa implementasyon kaini.
Target kan komisyon na maaraman asin kun sisay an dapat mapanimbag, asin kun pano malilikayan an pang-aabuso sa pondo kan bayan.
Igwang kapangyarihan an ICU na irekomenda na i-freeze an mga pagsasadiri, i-hold an biyahe kan mga pig-iimbestigaran o tulos sindang suspendiron tanganing dae makapanghimasok sa ebidensiya.
Pwedeng isangat kan komisyon an mga naaraman sa Office of the President, Department of Justice, Office of the Ombudsman, asin iba pang ahensiya para sa karampatang aksiyon.
Sa nasambitan ng Executice Order, sinugo man an mga ahensiya kan gobyerno na makipagtabangan digde, mantang an mga dae makikisumaro an pwedeng masunadan nin disciplinary action.
