Pigtalaga ni Presidente Ferdinand Marcos Jr. si dating Supreme Court Justice Andres Reyes Jr. komo chairperson kan Independent Commission for Infrastructure o ICI.
Sa sarong press conference ngunyan na Lunes, pigsaysay kan Presidente na papamayuhan ni Reyes an nasambitan ng independent super body.
Komo bagong pamayo kan ICI, ini an mangengenot sa imbestigasyon sa mga iregularidad bako sana sa flood control projects kundi magin sa gabos kan national government infrastructure projects sa nakalihis na sampulong taon.
Si Reyes an nagserbe komo associate justice kan Korte Suprema puon 2017 hasta 2020 makalihis ining italaga ni dating Presidente Rodrigo Duterte.
Antes ini, nagpuon an saiyang judicial career bilang trial judge kan 1987 sa Metropolitan Trial Court kan Makati asin Regional Trial Court ng San Mateo, Rizal.
Kan 1999, ini an naitalaga komo associate justice ng Court of Appeals asin nag-abot pa komo Presiding Justice kan 2010.
Gikan man si Reyes sa pamilyang igwang hararom na tradisyon sa hudikatura.
Ini an aki kan dating Court of Appeals Presiding Justice Andres Reyes Sr. asin maku-apo ni Justice Alex Reyes Sr., na nagserber sa parehas na Court of Appeals asin Korte Suprema.
Kaibahan sa komisyon sinda dating Public Works Secretary Rogelio “Babes” Singson asin SGV & Co. country managing partner Rossana Fajardo, mantang pigtalaga man si Baguio City Mayor Benjamin Magalong komo special adviser asin investigator.
