Aram baya nindo mga ka-bombo napano nin emosyon na igwang salak nin kababalaghan an debut party kan sarong babae sa Batangas huli sa pinagtutubudang pagsanib kan kaluluwa kan nagadan na ama kan debutante sa saiyang kuya mantang pigsasagibo an tradisyunal na 18 roses dance.
Sa video na pinahiling, naghibi an debutante asin an saiyang mga kaparientes huli ta pig-alalayan an saiyang tugang na dae soboot marumduman an nangyari.
Sa pagpuon kan party, mahihiling na maogma an gabos. Alagad nagbago an sitwasyon kan magin last dance kan debutanteng si Aria Mae delos Santos, an saiyang kuya.
Dae soboot piglaoman kan debutante na aapudon ini kan saiyang Kuya sa palayaw na an ama sana an nag-aapod saiya.
Sampulong taon na an nakalihis kan nagadan an ama ni Aria, asin Grade 3 pasana ini kaidto.
Duman na narealisar ni Aria na posibleng nagsanib an saiyang ama sa saiyang Kuya.Magin an iba nindang mga tugang asin kaparientes nakikugos naman sa sainda siringman an mga bisita dae na man napugulan na mapaluha.
Piggamit man ni Aria an pagkakataon tanganing makahagad nin tawad sa saindang ama sa saiya soboot kakulangan kan nabubuhay pa ini.
Makalihis an pirang segundo, nagbalik na an malay kan Kuya ni Aria na mayong marumduman asin nariribong sa nangyari.
Aram ni Aria na dakol an dae matubod sa nangyari sa sainda.
Sa katotoohan igwang mga nam-bash digde kan i-post an video. Alagad an importante nakuanan nin video an pangyayari na dawa mayo na an saiyang ama nakugos asin nakabayle ini kan daraga saiyang debut.
