Pigbuyagyag ni dating Department of Public Works and Highways (DPWH) Bulacan district engineer Henry Alcantara an katiwalian sa flood control projects na kinaimbuweltuhan kan nagkapirang lehislador.
Piggibo ni Alcantara an pahayag makalihis basahon an salaysay sa isinagibong pagdangog kan Senate Blue Ribbon Committee ngunyan na Martes, Setyembre 23, 2025.
Sigun ki Alcantara sinda Senador Joel Villanueva, Senador Jinggoy Estrada, dating Senador Ramon “Bong” Revilla Jr., asin Ako Bicol Rep. Zaldy Co komo mga nakinabang sa budget insertions asin kickbacks.
Dugang pa ni Alcantara, si dating DPWH Undersecretary Robert Bernardo an nagsugo sa saiya katakod kan mga pondong nakatagama soboot para sa mga nasambitan ng opisyal.
Sigun pa ki Bernardo na an P300 million gikan sa 2024 General Appropriations Act (GAA) insertions para ki Revilla, na nagdalagan sa Senado kan nakalihis na taon.
Sa kaso man ni Sen. Villanueva, pigsaysay ni Alcantara na naghagad ini nin P1.5 billion para sa sarong multipurpose building kan 2022, mantang P600 million sana an naaprubahan.
Mantang, pigpayuhan soboot si Alcantara ni Bernardo na magtagama nin P150 million sa sarong proyekto para ki Villanueva, na napaduman sa flood control projects na dae aram ni Villanueva.
Katakod kaini, pigbuyagyag man ni Alcantara na pigtao kaini an P150 million sa sarong rest house sa Bulacan sa sarong empleyado ni Villanueva na pigbibistong si Peng.
Dae soboot aram kan kampo ni Villanueva na an kwarta gikan sa flood control funds.
Mapadapit man ki Sen. Estrada, pigtawan duon ni Alcantara na nabanggit sa sainda ni Bernardo an natatadang P355 million gikan sa 2024 budget na para ki “SJE,” na pigtukdo komo si Estrada. Alagad mayo nin direktang komunikasyon sa nasambitan ng senador.
Sa huri, pig-imbwelto man ni Alcantara si Rep. Zaldy Co, makalihis sindang maghilingan kan Setyembre 2021 sa sarong pagtiripon kun saen pinag-uulayan soboot an kamugtakan kan pondo sa distrito ni Alcantara para sa flood control projects.
