Posibleng an Netherlands an masirbing “host country” o nasyong maako ki dating Presidente Rodrigo Duterte enkaso tugutan ini kan International Criminal Court (ICC) na paramientras makaluwas nin kulungan, sigun ki Atty. Maria Kristina Conti, assistant to counsel sa ICC.
Sigun ki Atty. Conti, nakabugtak sa court records na primerong iluluwas an dating Presidente sa Dutch territory huli ta digde man manunutaran an ICC.
Igwa nin suhestyong pwede na man ining magtinir sa Netherlands sa irarom kan house arrest imbes na maglipat pa sa ibang nasyon.
Pigtawan-duon ni Conti na labing importante an pagsunod sa mga kondisyon kumparar sa kun saen na nasyon iluluwas an dating Presidente, kabali digde an dae paggibo nin panibagong krimen, bakong panghihimasok sa proseso, asin pagbabalik sa korte sa itinalaang panahon.
Dugang pa ni Atty. Conti, posibleng makaapektar sa desisyon kan ICC an asal kan pamilya Duterte, siring man mga pahayag ni VP Sara Duterte na nagpapahiling nin pagsayuma sa pagigin lehitimo kan Korte.
Pigsaysay pa ni Conti an pahayag kan Bise Presidente na nadukayag mayong pagmangno si Duterte sa saiyang kwarto.
Nilinaw soboot kan ICC na igwa nin nakapreparar na mga doktor asin nars tangani siertuhon an kasalbaduhan asin marhay na salud kan mga nakakulong, asin dae basta iniluluwas o iheheras an medical records.
Pighurot ni Conti na mawot pa man kan mga pamilya kan mga biktima kan giyera kontra iligal na droga na malusog an dating Presidente tangani mahampang an paglilitis asin makua an katarungan.
Marurumduman, liwat hinagad kan kampo kan dating Presidente an interim release huli sa haloy na pagkauktaba kan proseso asin isyu sa pagsusuri kan saiyang salud.
Sa presente, nakakulong sa The Hague an dating Presidente mantang hinahalat an naudlot na kumpirmasyon kan kaso kony sa saiya.
