Nagpakol sa labi P5 million na kantedad kan iligal na droga an nakumpiskar asin 113 drug suspects an naarestrar sa Bicol Region kan nakalihis na September, sigun sa Police Regional Office-Bicol.
Sigun ki PRO-5 Director, Brig. Gen. Nestor Babagay Jr., an serye kan operasyon nagresulta sa pagkakasamsam kan nasa 22.20 grams kan marijuana asin 756.52 grams kan shabu.
Katakod digde, kabali man sa mga naarestrar na suspek an walong high-value individuals asin 105 street-level personalities sa paagi man kan nasa 101 na operasyon kabali na an pagserbe kan search warrants, buy-bust operations, asin iba pang law enforcement efforts.
Mientrastanto, an Masbate an nakapagrehistro nin pinakahalangkaw na kantedad kan iligal na droga na nagpapakol sa P2 million; pigsunad kan Naga City na igwang P1.3 million; Camarines Sur na igwang P898,457.04; Albay na igwang P516,944; Camarines Norte na igwang P291,372; Sorsogon na igwang P83,584; asin Catanduanes na igwang P8,228.
Sa ngunyan, liwat man na pig-omaw ni Babagay an dedikasyon kan mga kapulisan sa saindang paglalapigot na mamantinir an paz y orden asin proteheran an publiko kontra sa mga pigpapangalad na bulong.
