Pigpahimutikan kan majority bloc an panibagong huma kan kudeta sa liderato man ni Senate President Tito Sotto III.
Pirang aldaw antes magsarong bulan puon kan ribayan ni Sotto si Senator Francis Escudero sa pwesto, nagbubutwa man ngunyan an isyu dapit sa kudeta sa liderato asin an iriribay soboot na Senate President si Senate Minority Leader Alan Peter Cayetano.
Sigun ki Senate President pro-tempore Ping Lacson, bako ining totoo asin an pinaparibok na coup plot an sarong lumang rehashed psywar tactic na obhetong ribungon asin intrigahon an mga myembro kan mayorya.
Pigtawan duon pa ni Lacson na mayo mang katotoohan na igwang kinaaraman ini sa saiyang pagbubutas komo Chairman kan Senate Blue Ribbon Committee.
Pigsierto kan senador na mayong makakapagpaluya sa saiyang adbokasiya kontra sa korap asin bulok na sistema partikularmente na sa dae tamang paggamit asin pang-aabuso sa kwarta kan taumbayan.
Magin si Senate Deputy Majority Leader JV Ejercito na enot na nag-ako na kadikit pa ining magkalas sa mayorya an pigtawan duon na “super fake” an nagkukuriyat na baretang kudeta asin ini an matukaw komo Senate President pro-tempore karibay ni Lacson.
