Nahilingan kan Civil Aviation Authority of the Philippines (CAAP) nin kadikit na mga bitak an logistics building kan Dipolog Airport kasunod nin pagtama kan makusog na linog sa Davao Oriental kasubagong aga, Oktubre 10.
Sa iniluwas na statement kan ahensiya, basado sa initial assessments, mayong dakulang danyos an naikurit sa mga pasilidad kan mga palupadan sa nasyon, apwera sana sa minor cracks sa Dipolog Airport.
Nagsagibo man an CAAP nin inspeksiyon tanganing masierto pa man an structural integrity kan pasilidad asin masiguro an kasalbaduhan kan mga pasahero.
Mantinido man na operational an gabos ng palupadan sa nasyon na nasa irarom kan hurisdiksiyon kan CAAP sa ibong kan pagtama kan makusog na linog.
Mientrastanto, sigun sa ahensiya, igwang duwang commercial flight pasiring Davao an na-divert. Kaiba an flight gikan Manila-Davao, na na-divert pasiring Mactan-Cebu International Airport.
Na-divert man pasiring General Santos International Airport an saro man na flight gikan sa Manila pasiring Davao.
