NAGA CITY – Padagos an kolaborasyon kan Barangay Balatas, Naga City sa Barangay Operations Office dapit sa Family Planning tanganing magin zero cases na sa teenage pregnancy an nasambitan ng barangay.
Sa entrevista kan Bombo Radyo Naga ki Maribel Bejerano, Barangay Service Point Office kan Balatas, sinaysay kaini na kan nakalihis na taon nagkaigwa nin 30 cases kan teenage pregnancy an saindang barangay asin sa presenteng taon igwa nin 12 kaso.
An siring soboot na record maikokonsederar na nakakaalarma orog na para sa magigin epekto kaini sa komunidad asin sa mismong buhay kan mga jovenes.
Susog sa record kan nasambitan ng opisina, 15 anyos an pinakahuben na kaso kan teenage pregnancy an naikurit sa nasambitan ng lugar.
An siring na edad nakaka-alarma kun kaya padagos man an pagbusol kan mga programa asin interbensyon tanganing masimbagan an problema.
Saro na digde an Family planning na kaipuhan nang pag-urulayan sa presente.
Mientrastanto pagirumdom man kaini sa kajovenan na magkaigwa nin kaaraman sa mga nagigin epekto kan pagbabados nin amay tanganing magin aware sa mga consequences na saindang kakahampangon.
Sa ngunyan, pangapudan man ni Bejerano sa mga magurang na tukduan an mga aki na magin aware asin magkaigwa nin open communication sa laog kan pamilya tanganing malikayan an nasambitan ng problema.
