NAGA CITY- Pigsugo kan Regional Disaster Risk Reduction and Management Council Bicol an gabos na mga lokal na gobierno sa bilog na Rehiyong Bikol na i-update an saindang contingency asin disaster response plans huli sa sunod-sunod na makukusog na linog na namatean asin mga raot nin panahon.
Sigun ki Claudio Yucot, an chairperson kan Office of Civil Defense Bicol asin and RDRRMC Bicol, an nasambitan ng reports na isusumiter kan mga LGUs an susurion tanganing maaraman an mga labot na kaipuhang mapanuan, pagtama kan mga aksyon na dapat gibuhon asin pagkakaigwa nin pinagsarong regional na plano para sa linog, asin kapreparaduhan sa tsunami.
Apwera digdem an mga lokal na gobierno an pig-enkaminar na makipag-koordinar sa Philippine Institute of Volcanology and Seismology tanganing maaraman an mga hararaning fault lines asin magkundusir nin earthquake drills ngunyan na bulan.
Katakod digde, an inaapod na evaluation team an bibilugon tanganing iyong mamayo sa pag-analisar kan mga reports asin magrekomenda sa national level sa mga problema na dae kayang simbagan sa regional level.
An nasambitan ng team an pigbibilog kan representante gikan sa departments of social welfare, Interior and local government, education, Philippine National Police, Armed Forces of the Philippines, asin iba pang ahensiya.
Sa ngunyan, sa paagi kaini naglalaom an opisyal na mapalangkaw an kapreparaduhan kan gabos sa panahon kan katibaadan.
