Pighagad ni Senate Committee on Finance Chairman Senador Sherwin Gatchalian sa Department of Labor and Employment (DOLE) na tulos magsagibo nin employment risk assessment tanganing maaraman an posibleng epekto sa trabaho asin ekonomiya kan pagbawas sa pondo kan gobyerno para sa mga proyektong pang-imprastraktura, kasunod kan isyung pigkakahampang kan mga flood control projects.
Pigtawan-duon ni Gatchalian, na an darakulang tapyas sa prosopwestong pondo kan Department of Public Works and Highways (DPWH) an pwedeng makapugol sa mga pamumuhunan sa imprastraktura.
Sigun sa saiya, importanteng parte kan pag-uswag kan ekonomiya an gastuson kan gobyerno, huli ta ini an nag-aambag nin poco mas o menos 15% sa taunang gross domestic product (GDP) kan nasyon.
Alagad maski nagtitinir na obheto kan Finance Committee na masierto an katapatan asin integridad kan 2026 national budget, pati na an paglikay sa mga iregularidad na naeeksperyensiyahan sa 2025 budget, pighurot ni Gatchalian na kaipuhan magin maingat sa mga posibleng epekto kan pagbabawas sa paggastos sa imprastraktura huli ta pwede ining makaapektar sa employment, consumer spending, asin pangkabilogang kamugtakan kan ekonomiya.
Dugang pa kan senador, na dapat ibali kan DOLE sa saindang pagsusuri an mga panluwas na salik siring kan 19% tariff na ipinataw kan Estados Unidos sa mga produktong gikan sa Pilipinas, siring man an mga nag-iiral na tensiyon sa manlaen-laen na parte kan kinaban, na pwedeng makaapektar sa kalakalan asin oportunidad sa trabaho.
