Tinuldukan na kan Office of the Ombudsman an ulayan dapit sa pagkokonsiderar sa mag-agom na Curlee asin Sarah Discaya komo mga state witness.
Sigun mismo ki Assistant Ombudsman Mico F. Clavano, tagapagtaram kan opisina, mayo ng pag-asa an mga Discaya tanganing kuonon pa komo testigos kan estado.
Dara soboot ini sa pahayag asin pigpapahiling na pagtutol kan mag-agom sa kooperasyon asin pakikipagtabangan ninda sa gobyerno katakod sa nagpapadagos kaining imbestigasyon sa flood control projects anomaly.
Kun kaya imbes na kuonon komo state witness, pigkokonsiderar na ngunyan kan Ombudsman an mga Discaya komo mga ‘hostile witnesses’ sa kaso.
Dugang pa kaini huli sa dae na sinda pigkonsiderar na magin ‘state witness’, an mag-agom ngunyan an mahahampang komo mga respondents o akusado sa mga reklamo o kasong isusunad an Ombudsman kontra sa sainda.
Sigun ki Assistant Ombudsman Clavano, reklamong malversation of public funds, falsification of public documents asin iba pang reklao katakod sa krimen an pwede nindang kahampangon.
Inihayag pa ni Assistant Ombudsman Clavano na sierto man na dae makakalusot an mag-agom sa paninimbagan huli man ta labi 4 ribong project bids an binalihan kan mga Discaya.
Kun kaya maduon na pinanindugan kan nasambitan ng tagapagtaram na ‘imposible’ ng matupad an kahagadan kudta nindang makua pa komo mga ‘state witnesses’ sa kaso.
Pigdugang man ni Assistant Ombudsman Clavano na alinsunod sa dae na pakikipagtabangan kan mga Discaya an babawion na man an proteksiyon hatod kan gobyerno sa mag-agom na dapat kudta ng kalakip kan saindang pagtestigo.
Paliwanag kaini na an proteksiyon pigtatao sa sainda an dara kan sinda mag-apply para sa protection program kan Department of Justice sa obhetong magin state witness.
