NAGA CITY- Nagkundusir an Land Transportation Office Bicol nin random Drug Testing sa mga Bus driver asin Konduktor sa Bicol Central Station.
Sigun ki Glenn A. Mancera- Chief, kan Land Transportation Office Bicol, an nasambitan ng lakdang an preparasyon para sa papaabuton na Undas 2025.
Katakod digde, an mga behikulo na naglalaog sa probinsiya an nag-aagi sa pag-inspection kan LTO Bicol katabang an magkakanigong ahensiya siring kan PDEA Bicol.
Paliwanag kan opisyal oras na magpositibo sa iligal na droga sa pigkundusir na confirmatory test an mga driver ire-revoke an saindang lisensiya asin mahahampang sa magkakanigong kapadusahan.
Dugang pa ni Mancera, kaipuhan na masierto na dae naggagamit kan mga pigpapangad na bulong an mga driver asin Konduktor tanganing masierto an kasalbaduhan kan publiko orog na ngunyan na piglalaoman an pagdagsa kan mga tawo sa probinsiya asin sa manlaen-laen na lugar sa Bicol Region.
Mientrastanto, pigpatanidan man kan opisyal an mga biyahero na sumunod sa saindang piglatag na panundunan dapit sa salbadong pag-obserbar kan Undas.
Sa ngunyan, hagad na sana kaini an kooperasyon kan publiko tanganing malikayan an anuman na klase kan katibaadan.
