NAGA CITY – Piglalaoman kan Libmanan Municipal Police Station na mapakol sa 20-K katawo an madagsa sa mga sementeryo sa saindang banwaan.
Sa entrevista kan Bombo Radyo Naga ki PSSG Juan Batolina, PIO kan Libmanan MPS, sinaysay kaini na naka heightened alert na an saindang lado katakod kan Undas asin nagbaba na an operation sector nin warning order tanganing maaraman na kan mga kapulisan kun saen sindang istasyon o sementeryo made-deploy.
Kan nakalihis na aldaw nagpuon an pagbabandilyo kan nasambitan ng hepatura asin nagpatanid sa mga paratienda siringman sa publiko na dae pewede an arak, mga patarom, baraha, asin makukusog na speaker sa laog kan sementeryo tanganing masierto na magigin matuninong asin salbado an pag-obserbar kan Undas.
Dugang pa kan opisyal, nagpatanid naman sinda sa mga malinig na amayan ini huli ta sa Nobyembre 1 bawal na an magdara nin mga patarom na bagay sa sementeryo.
Mientrastanto, pigsaysay man kan opisyal na an private cemetery madali sana an pagmahera kan entrance asin exit gate alagad sa public cemetery dae kontrolado kaya nangangapudan man nin tabang an opisyal sa mga Barangay Tanod asin iba pang voluenteers tanganing magin marhay an pag-obserbar kan Undas sa saindang lugar.
Sa ngunyan, pig-asegurar na sana ni Batolina na anumang oras nakabantay an kapulisan tanganing masierto na salbado an nasambitan ng kasiributan.
