NAGPALUWAS an alkalde kan siyudad nin Naga nin polisiya para sa pagpapaabot nin report kontra sa korupsyon.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na igwa sindang pigbubusol na Whistle blower policy na katakod sa zero tolerance for corruption.
Sigun ki Robredo, igwa soboot nagsusumbog sa sainda alagad natatakot na mabalikan orog na kun an mga tawong imbwelto digde iyo an saindang mga superior.
Huli kaini, nabilog an pigtutulod na Whistle blower policy kun saen obheto na maproteheran an mga indibidwal na nagbubuyagyag kan saindang naaaraman kontra sa katiwalian o korupsyon siringman mga bulok na sistema.
Dugang pa kan alkalde kaipuhan an siring na polisiya tanganing gibuhong masakit an pagigin korup.
Mientrastanto, pigsaysay pa ni Robredo na padagos an saindang ginigibong lakdang tanganing malikayan an katiwalian siring na sana kan pagkakaigwa nin spending guidelines, pagbayad kan procurement sa laog kan 30 days asin iba pa.
Sa ngunyan, pigsierto na sana ni Robredo na dagos-dagos an saindang pagbilog nin mga polisiya na makakatabang sa komunidad.
