NAGA CITY- Pigsaysay kan Comelec Naga na haros kajovenan an nagpaparehistro sa saindang opisina para sa nagpapadagos na Voter’s Registration para sa 2025 Barangay asin Sangguniang Kabataan Election.
Sa entrevista kan Bombo Radyo Naga ki Atty. Maico Julia Jr, Election Officer kan Comelec Naga, sinaysay kaini na nagpakol sa haros 70% kan mga kajovenan sa siyudad an nag-a-avail kan nasambitan ng registration.
Sigun ki Julia magayon soboot an boot sabihon kaini orog na ta nagpapahiling an porsyento na kadakol nang mga jovenes an mawot magpartisipar sa ikukundusir na eleksyon sa masunod na taon.
Dugang pa kan opisyal, nagmarhay man an numero kan saindang new registrant orog na sa pigkundusir na satellite registration kun saen nag-aabot sa lampas 100 an nagpaparehistro.
Paliwanag kaya ni Julia na didikit sana man an mga indibidwal na nagpapasiring sa saindang opisina para sa nasambitan ng registration kun kaya mas marhay an bara-barangay kun saen mas naidudulok kan mga ini an saindang serbisyo sa tawo.
Sa ngunyan, pigsaysay na sana ni Julia na bukas an saindang opisina puon alas 8 nin aga hasta alas 5 nin hapon sa aldaw nin Lunes hasta Sabado para sa nagpapadagos na Voter’s Registration.
