Nagin produktibo an enot na aldaw kan Asia-Pacific Economic Cooperation (APEC) Summit na pig-atenderan ni President Ferdinand Marcos Jr. sa Gyeongju, South Korea.
Digde nagtiripon an mga lider kan 21 member economies tanganing pag-ulayan an mga isyung igwang kinaaraman kinalaman sa regional growth, inclusivity, asin digital innovation.
Sa intervention sa APEC Economic Leaders’ Meeting, pigtawan duon ni PBBM an importansiya kan pagbweltada kan marhay na dispute settlement mechanism kan World Trade Organization (WTO).
Ini soboot an magseserbeng pantay na laban o equalizer para sa mga sararadit na ekonomiya siring kan Pilipinas na naglalaom sa patas na sistema kan kalakalan.
Nagtao nin espesyal na patara-tara sa APEC CEO Summit sa Gyeongju Arts Center si Presidente Marcos, kun saen pigtawan duon an importansiya kan pusog na koordinasyon kan gobierno asin pribadong sektor para sa mas inklusibong pag-uswag sa bilog na rehiyon.
Apwera digde, nagkaigwa man nin bilateral meeting an Pilipinas asin South Korea kun saen pinag-urulayan an pagpapakusog kan defense cooperation, trade, asin investment opportunities.
Sa kabilugan, nagin marhay, produktibo an enot na aldaw kan APEC Summit patotoo na preparadong makipagtabangan an mga lider kan Asya-Pasipiko para sa mas pusog asin mauswag na rehiyon.
