Pigsierto ni President Ferdinand Marcos Jr., na tulos na makakaresebir nin tabang an mga residenteng naapektaran kan Bagyong Tino, makalihis ipag-sugo sa gabos kan ahensiya kan gobyerno an marekas na pagresponde sa kalamidad.
Sigun ki Presidential Communications Office (PCO) asin Palace Press Officer Undersecretary Claire Casto, nasa mga apektadong lugar na an mga ahensiya kan gobyerno tanganing maghatod nin pagkakan, bulong, asin iba pang primerong pangangaipuhan.
Ipinaaram man ni Castro na tulos nagpadara an Department of Health (DOH) nin mga bulong, malinig na tubig, hygiene kits, asin water containers sa Cebu, Aklan, asin Eastern Visayas na nagkapira sa mga pinakaapektadong rehiyon.
Padagos man soboot an pagbabantay kan DOH sa posibleng lahar threat sa Bulkang Kanlaon huli sa padagos na pag-uran. Mientrastanto, nagheras man an Department of Social Welfare and Development (DSWD) nin labi 121,000 family food packs asin 1,600 ready-to-eat mealsnsa mga rehiyon kan CALABARZON, Bicol, Visayas, Caraga, asin nagkapirang parte kan NCR asin Zamboanga.
Nagtap man ini nin pinansiyal na tabang sa mga pamilyang nawaran nin mahal sa buhay asin mainit na pagkakan sa mga na-stranded na pasahero asin motorista.
Sigun ki Castro, padagos na bantay-sarado kan mga miyembro kan Gabinete an sitwasyon tanganing masierto an marekas na paghahatod nin tabang sa gabos kan apektadong lugar.
Pigreport man ni DICT Secretary Henry Aguda na nakikipagtabang an ahensiya sa mga primerong telecommunications companies tanganing maparekas an pagbweltada kan komunikasyon sa mga lugar na sinalanta kan bagyo.
