Inatasan na kan Office of the Ombudsman an binilog kaining Special Task Force sa flood control scandal na tutukan an mga proyektong dapat kuta makakatabang tangani mabawasan an epektong dara kan Bagyong Tino.
Sa iniluwas na opisyal na pahayag kan Ombudsman, pig asegurar kaining gigibuhong prayoridad mga proyektong dae gumana o palpak kan manlamasa an hagupit kan bagyong nakalihis.
Makaseseguro soboot an publiko na nag gugulong an imbestigasyon kan special task force tangani mapanimbag an mga imbwelto sa maanomalyang mga proyekto.
Mantang pigheras man kan Ombudsman an pakikisumaro asin pakikidumamay kaini orog na sa mga naapektaran asin biktima kan bagyo na iyong nagkawsa sa pagkagadan kan nagkapirang mga indibidwal.
Kun kaya man inihayag kan tanod-bayan na saindang gigibuhon an gabos tangani makua sana an katarungan asin maresolbar an isyu nin korapsyon kinakahampang kan nasyon.
Alagad sa ibong kaini, an nagkapirang militanteng grupo man na nag sugod sa Office of the Ombudsman an agrangay soboot iyo an maluyang aksyon kan tanggapan.
Hurot kaya ni Mong Palatino, Secretary General kan Bagong Alyansang Makabayan na garu nagigin ‘selective justice’ sana an nangyayari.
Kahagadan kaini na dapat igwa nin manimbag orog na sa parte kan Cebu na marurumdumang labing nadanyaran kan matinding pagbaha kansuarin sana kan hagupiton kan Bagyong Tino. Siring man digde an pananaw ni Albert Pascual, Secretary General kan Health Alliance for Democracy, naninindugan na dapat mayong pinipili sa kun siisay sana an papanimbagon.
Dapat kaiba man pati mga haralangkaw na opisyal kan gobyerno maabot sa Malacanang o mismong ki Presidente Ferdinand ‘Bongbong’ Marcos Jr.
