In-activate na kan Department of Health (DOH) an National Public Health Emergency Operations Center (PHEOC) kasunod kan mahewasang danyos na winalat kan nakalihis na bagyong Tino asin komo pagpepreparar na man kan epekto kan bagyong Uwan.
Sa sarong statement, sinaysay kan DOH na masirbi ini komo primerong emergency operations centers tanganing masierto na sentralisado o saro an linya kan koordinasyon sa oras kan health-related emergencies alinsunod sa mandato kan National Disater Risk Reduction and Management Council (NDRRMC).
Papahiguton man sa tabang kan emergency operations center an mekanismo para sa pagresponde puon sa national hasta sa mga lokal na gobyerno.
Pigbibilog ini kan limang sections sa pangengenot ni Health Secretary Ted Herbosa komo Responsible Officer kaibahan si ASec. Gloria Balboa komo Incident Manager para sa pangkabilogang operasyon.
Kaibahan sa mga gampanon kan limang section sa irarom kan national emergency operations center iyo an pagpapaluwas nin impormasyong dapat na maaraman kan publiko, pagsisierto kan kapakanan kan mga staff kaini, koordinasyon sa mga ahensiya kan gobyerno, rehiyon, opistal lokal na gobyerno asin international states, siring man an pagsierto kan bastanteng logistics asin kinakaipuhang pondo.
Pigsierto man kan ahensiya na mas papahiguton pa ninda an pagresponde sa mga health-related emergencies sa tahaw kan panlalamasa kan bagyo.
