Pig-apod na guni-guni ni Senate President pro-tempore Ping Lacson an pahayag ni Senator Imee Marcos na igwang nagkapirang testigo na magre-recant o mabawi sa saindang naenot nang testimonya katakod sa maanomalyang flood control projects.
Marurumduman, pigsaysay ni Sen. Imee na abangan an masunod na pagdangog kan Blue Ribbon Committee asin sigurado ini na saro-sarong babawion kan mga testigo an saindang salaysay dapit sa mga nagin rebelasyon sa flood control projects scandal.
Saro na digde si dating Marine Technical Sergeant Orly Guteza na sigun ki Sen. Marcos an igwang magabat na testimonya asin igwang personal knowledge sa katiwalian sa flood control huli ta pig-ako kaini na naghahatod nin male-maletang kwarta sa harong ninda dating Speaker Martin Romualdez asin dating Cong. Zaldy Co.
Alagad pigsaysay man ni Lacson na huli ta kompleanyo man ni Sen. Imee kaay dae soboot kaini papatulan maski guni-guni sana an sinabi kan senadora.
Bukas, November 14, liwat ipapadagos kan Senate Blue Ribbon Committee an pagdangog dapit sa maanomalyang flood control projects kun saen pigpapaimbitaran kan komite na maghampang sa imbestigasyon an 17 kongresistang pinangaranan kan mga Discaya na imbwelto sa flood control projects, si Romualdez asin si Cong. Eric Yap.
