Scapegoat kun ikonsiderar ni dating Ako Bicol Rep. Elizaldy Co an saiyang sadiri na sentro ngunyan kan flood control scandal, soboot piggagamit sana ini na “scapegoat” o panakip butas sa gabos kan katiwalian.
Sa sarong uploaded video ni Co na naghaloy nin 6 na minuto naghampang ini sa primerong pagkakataon asin nanindugang dae na ini matuninong pa asin ibubuyagyag an katotohanan.
Sinaysay ni Co na naghali ini nin nasyon para sa sarong medical checkup kan Hulyo asin plano kaining magbalik antes an State of the Nation Address kan Presidente.
Mismong si House Speaker Martin Romualdez soboot an nagsabi sa saiya sa sarong apod sa telepono na magtinir na out of the country asin aatamonon komo kasuguan pa kan Presidente.
Kaidto, nagtubod soboot ini ki Romualdez asin Presidente Marcos kaya dae ini nagbalik. Alagad lingid sa saiyang akaaraman an buot sabihon palan, aatamanon asin gagamiton soboot ini komo panakip-butas sa saindang kampanya laban sa korapsyon.
Inamin pa ni Co na sa puon kan bicameral process kan taong 2024 mismong si Budget Secretary Amenah Pangandaman an nagsabi sa saiya na nakipaghilingan an sekretaryo ki Presidente Marcos asin inaatasan si Co na maglaog nin P100 billion kantidad kan proyekto sa budget. Saiya soboot na bineripika an sinaysay ni Pangandaman ki Undersecretary Adrian Bersamin.
Sinaysay kan kampo ni Co sa Kamara na an ipinaluwas na video an pangenot pa sana asin igwa nin mga kasunud pang iluluwas. Si Co an nagtitinir na nasa luwas kan nasyon.
