Pigsaalang-alang kan Estados Unidos an obesity o pagkakaigwa nin mga aki na may espesyal na pangangaipuhan komo mga rason tanganing sayumahan an immigrant visa, sa pinakabagong lakdang ni Presidente Donald Trump tanganing maitaboy an mga dayuhan.
Sa sarong surat na pigpadara kan nakalihis na bulan, pigsugo kan Sekretaryo kan Estado na si Marco Rubio an mga embahada kan US na iiba an mga kondisyon siring kan obesity sa pag-isyu kan panghaluyang visa, sa rason na an pagiging obese pwedeng “mangaipuhan nin gastos asin panghaluyan na pag-aataman.”
Pighagad man kaini sa mga embahada na surion kun an sisay man na dependent an igwang kakundian, malalang kondisyon sa salud, o iba pang espesyal na pangangaipuhan asin nangangaipuhan nin pag-aataman” hasta sa dae na makapagtrabaho an aplikante kan visa.
Pigkumpirmar kan AFP na saro na an Estados Unidos sa mga nasyon na igwang pinakahalangkaw na antas kan obesity, na katakod kan mga salik siring kan pagkakan asin kakulangan sa ehersisyo.
Poco mas o menos 40 porsyento kan populasyon kan US an obese, na igwang halangkaw na antas sa mga estadong !nagboto ki Trump.
An bagong giya pigpautob para sa mga tawong naghahagad na mag-istar sa Estados Unidos asin bako para sa mga dayuhang nagbibisita sana sa halipot na panahon.
Alagad si Trump nagin masigasig sa paghahanap nin mga rason tanganing sayumahan an paglaog mantang pigsasagibo an mahewasang crackdown kontra sa migrasyon, saro sa saiyang premirong promisa sa kampanya.
Nagtagama an administrasyong Trump nin pondo para sa pagdakol kan pigpapautob kan ley sa imigrasyon sa obhetong ipadeport an mga undocumented migrants maski mayo sindang nagibong krimen apwera sa pagbalgar sa imigrasyon.
Kahagadan man ni Rubio na kanselahon an mga visa kan mga tawong nahihiling na nagkakalaban sa panundunang panluwas kan US, kaibahan na an mga pahayag dapit sa Israel.
