Nag-abot sa haros 650,000 an mga kapatid o miyembro kan Iglesia Ni Cristo (INC) an nakisumaro sa enot na aldaw kan ”Transparency for a Better Democracy” rally sa Quirino Grandstand, kasuodma, Nobyembre 16, 2025.Sigun sa Manila Disaster Risk Reduction and Management Office, pigkakarkulong nasa labi 650,000 katawo an mga nag-atendir sa lugar pag-abot nin ala-6 nin banggi.
Nagpuon an hiro-protesta kasuodma, asin nakatalaang magpadagos hasta Miyerkules, Nobyembre 17. Sulot kan mga nag-atendir an puting bado na igwang nakasurat na ”Transparency for a Better Democracy.”
Obheto kan rally na pakusugon an pangapodan para sa transparency asin masusing imbestigasyon sa soboot mga anomalya sa mga flood control project na pinondohan kan trilyong pisong pondo kan bayan.
Pighurot pa kan INC an importansiya kan paninimbagan dapit sa mga nasa likod kan iregularidad na mga proyektong pang-imprastraktura kan gobyerno asin mabawi an anumang nawarang pondo sa bayan.
Sigun ki INC Spokesperson asin minister of the gospel Kapatid na Edwil Zabala, bukas an protesta magin sa mga bakong kasapi kan Iglesia.
Pig-anunsyar man kan opisyal na mapadagos sinda kan saindang matoninong pangapodan hasta mapanimbag an mga nasa likod kan korapsiyon.
Mientrastanto, kapansin-pansin man an mga inilatag na tent kan pamayuhan kan INC gikan sa T.M. Kalaw hasta Luneta Park asin binuksan man kan lokal na gobyerno kan Maynila an saindang tolong sports complex tanganing mag-ako nin mga mag-o-overnight na partisipantes.
Suspendido man an face-to-face classes sa Manila mantang nagpapadagos an protesta.
