NAGA CITY- Mahigot an pagbabantay kan Libmanan Municipal Police Station sa mga barangay na mayo pang kuryente sa saindang banwaan.
Sa entrevista kan Bombo Radyo Naga ki PSSG. Juan Batolina, Public Information Officer kan Libmanan Municipal Police Station, sinaysay kaini na deriktiba kan saindang pamayuhan na dugangan an pagpatrolya sa mga lugar na madiklom pa tanganing malikayan an insidente kan harabunan asin vehicular accident.
Katakod kaini, maogma man na pigsaysay ni Batolina na mayo man nairehistro na insidente kan harabunan o anupaman na mararaot na pangyayari sa saindang lugar maski igwang mag area na dae pa nakakabalik an kuryente.
Sigun pa sa opisyal padagos man an saindang pagpapagirumdom sa publiko partikular sa mga motorista na maagi sa madiklom na parte kan tinampo na maglikay orog na kun dae ini kabisado.
Kadalasan soboot kaya kan mga nagbubungkaras na problema iyo ini orog na sa mga area na kaipuhan pang pakarhayon.
Mientrastanto, huli ta papaabuton na an kapaskuhan asin bagong taon pigsierto ni Batolina na preparado an saindang lado orog na ta nagpapatabang man sinda sa mga Barangay Tanod sa pagmanehar kan bulos nin trapiko asin sa pagmantinir kan paz y orden.
Sa ngunyan, hagad na sana liwat kan opisyal an tabang kan saindang mga residente para sa mas salbadong komunidad.
