Inaprubaran kan Senado sa ikatulong pagbasa, sa botong 13-5-0, an Senate Bill No. 2387 na magtatakda nin limang taon na termino para sa mga opisyal kan Barangay asin Sangguniang Kabataan (SK).
Sa nasabing panukalang batas na isinunad ni Senador Francis “Chiz” Escudero, magkakaigwa nin bagong electoral cycle asin maresulta ini sa pagpapaliban kan nakatalaan na Barangay asin Sangguniang Kabataan Elections (BSKE) sa Nobyembre 2026 pasiring Nobyembre 2028.
Segun ki Escudero, katuyuhan kan propuesto na magkaigwa nin mas segurado asin organisadong sistema sa lokal na pamamahala tanganing malikayan anpauru-utrong pagpapaliban kan eleksyon kun nagkakasarabay ini sa nasyunal na botohan.
Mientrastanto tinutulan ini kan nagkapirang senador arog nina Senador Tito Sotto asin Joel Villanueva, na ku sain tinawan -doon kan mga ini na an liwat na pagpapaoktaba kan BSKE pwedeng makalapas sa Saligang Batas asin mag-aksaya nin haros P8 bilyon pesos na naitalang gastos kan Comelec para sa pagpreparar sa eleksyon ngunyan na taon.
Nakapasar na man sa ikatolong pagbasa an kaparehong propuesto sa House of Representatives (House Bill No. 10971), kun kaya nakatalaan na sana ining isairarom sa bicameral conference committee antes isumite sa Malacañang para sa pirma ni Presidente Ferdinand Marcos Jr.
