Nagbaba na an nairehistrong kaso nin dengue sa Barangay San Felipe, Naga City, hale sa haros 20 kaso pasiring sa tulong kaso na sana sa nakaaging mga aldaw.
Sa intrevista kan Bombo Radyo Naga Ki Alfonso Rodriguez – Barangay Captain, San Felipe, Naga City, padagos an pagbantay kan barangay tanganing malikayan an paglangkaw giraray kan mga kaso.
Kaiba sa mga lakdang na ginigibo an regular na spraying o fogging asin search-and-destroy operations sa mga lugar na posibleng pugaran kan namok.
Padagos man an information dissemination tanganing ipaaram sa mga residente na panatilihon na malinig an saindang mga harong asin palibot, orog na an mga lugar na pwedeng pag-ipunan nin tubig.
Mantang, sinabi ni Rodriguez na napag-orolayan kaiba an alkalde asin iba pang barangay captain an posibilidad nin pagdeklara nin state of calamity huli sa mga kaso nin dengue.
Alagad, pinagdoonan an maingat na paggamit kan calamity funds tanganing igwa man magamit para sa iba pang posibleng emerhensya.
Hinimok man ni Rodriguez an mga residente na makipagtabangan sa barangay asin mga health worker sa pagmantener nin kalinigan asin paglikay sa pagdakol kan namok.
Pinagirumduman man an publiko na gumamit nin mosquito repellent asin tulos na magpakonsulta kun makamati nin mga sintomas nin dengue.
Sa ibong kan pagbaba kan kaso, idinugang kan barangay na mahalaga pa man giraray an padagos na pag-iingat asin pakikiaram kan bilog na komunidad tanganing mapugolan an paglakop giraray kan dengue.
