Dae mababa sa 26 na Pilipino an nahahampang sa padusang kagadanan sa manlaen-laen na parte kan kinaban.
Ini an nagin sentro kan diskusyon sa Senado mantang pig-uurulayan an prosopwestong budget para sa Department of Migrant Workers (DMW) para sa taong 2026.
Sigun ki Senador Erwin Tulfo, an mga nasambitan ng Pilipino nakakuriyat sa manlaen-laen na nasyon, kun saen 9 sa sainda nasa Malaysia, 4 an nasa Brunei, asin an natatada nasa Jeddah adin Riyadh sa Saudi Arabia, pati na man sa Qatar asin Kuwait.
Pigdetalye pa ni Senador Tulfo, na iyong nangengenot sa pagproteher kan prosopwestong pondo para sa DMW, na aktibo an pakikipag-tabangan kan ahensya sa Department of Foreign Affairs (DFA).
Primerong obheto kaini na magtao nin kinakaipuhang legal na tabang sa mga Pilipinong nasambit.
Apwera pa digde, naglalapigot man sinda na maibaba an mga hatol na pigpataw sa mga ini.
Dugang pa kan opisyal, bako sana an mga Pilipinong nasa ibang nasyon an pigtatawan nin pansin, kundi pati na man an saindang mga pamilya na nasa Pilipinas, na pigtatawan nin magkakanigong tabang.
