Suhestiyon ni Senador Francis “Kiko” Pangilinan an pagkakaigwa kan transparency asin accountability mechanisms sa mga irrigation projects kan National Irrigation Administration (NIA).
An prosopwestong ni Pangilinan an tanganing dae na mautro pa an maanomalyang flood control projects.
Pigtawan-duon kan senador, na iyong liderato kan Senate Committee on Agriculture, Food, and Agrarian Reform, na importante an epektibo asin malinig sa korupsyon na mga irrigation projects tanganing mapamarhay an produktibidad sa agrikultura asin mapapusog an seguridad sa pagkakan kan nasyon.
Kairiba sa prosopwesto ni Pangilinan an sarong transparency special provision sa prosopwestong budget para sa 2026, kairiba an P50 milyon para sa pagbilog kan sarong public online dashboard.
Nakapalaman digde an pagpapahiling kan mga ladawan, geo-tagging, pangaran kan mga contractor, kantidad, asin status kan kada proyekto komo parte kan mandato para sa mas bukas na pamamahala kan NIA.
Sa subcommittee report na pigsumiter kaini ki Senador Win Gatchalian, chair kan Senate Committee on Finance, tinawan duon ni Pangilinan an dugang na pondo para sa tolong special provisions: Transparency of Irrigation Projects, Citizen Participatory Audit, asin Quarterly Reporting Requirement.
Sa irarom kan mga nasambitan na probisyon, obligadong magkriar asin magmantinir an NIA kan sarong public online dashboard na mapahiling jan timeline, status, pondo, awarded contracts, mga contractor, asin geo-tagged photos sa manlaen- laen na yugto kan proyekto.
Obheto kaining magtao nin real-time monitoring sa implementasyon kan mga proyekto asin gibuhon mas marekas ma-access kan publiko asin mga oversight agency an impormasyon dapit sa paggastos asin dalagan kan proyekto.
Pigtawan-duon man kan report an pangangaipuhan para suportaran kan NIA an Citizen Participatory Audit Program kan Commission on Audit (COA), na obhetong tawan nin mas dakulang papel an civil society sa pag-audit kan mga programa kan pamahalaan tanganing masierto an tamang paggamit kan pondo.
Pigrekomenda man ni Pangilinan an quarterly reporting requirement na ma-oobliga sa NIA na magsumiter kan report kada quarter sa House Committee on Appropriations asin Senate Committee on Finance. Kairiba digde an status kan mga proyekto, progreso kan implementasyon, pisikal asin pinansyal na accomplishments, asin mga isyung nakakaapektar sa pagtatapos kan mga ito.
Piglalaoman man ni Pangilinan na an gabos kan ahensya kan gobierno na nangangasiwa kan mga infrastructure project malaag man kan kumpletong detalye asin eksaktong coordinates sa saindang prosopwestong budget tanganing mapapusog pa an transparency asin accountability.
