Pig-iimbestigaran kan Department of the Interior and Local Government (DILG) an soboot data breach sa saindang internal systems makalihis an alegasyon kan cybersecurity advocacy group na Deep Web Konek na sarong hacktivist group an nakapag-“infiltrate” sa network kan ahensiya asin naka-“exfiltrate” soboot nin 400 gigabytes nin mga sensitive data kan gobyerno.
Sigun sa DILG, nagsasagibo na nin beripikasyon an saindang technical teams kaibahan an mga government cybersecurity units, asin sinaysay na nagtinir na stable an core service sa saindang paenot na pagsusuri.
Nag-activate na man ana ahensiya nin containment asins security protocols mantang nagpapadagos an imbestigasyon.
Pighagad kan DILG sa publiko na dae muna magtubod sa mga unverified posts mantang mayo pang opisyal na resulta an saindang pagsusuri.
Mayo pang pahayag an Department of Information and Communications Technology (DICT) katakod kaini.
Sa sarong Facebook post, sinaysay kan Deep Web Konek na an hacktivist group na #HappyGoLucky an nagluwas nin mga soboot patotoo siring kan screenshots, kaibahan an ladawan na nagpapahiling na igwang access an grupo sa DILG SQL interface.
Sigun sa initial review kan grupo, an database na nahiling an piggagamit para sa Gender and Development (GAD) document management system, na naglalaog nin labi 113,000 records kan internal reports, government templates, budget documents, asin iba pang administrative files —gabos soboot garong aktwal asin bakong test data.
Pigpapahiling man kan saro pang screenshot an soboot SQL system dumps gikan sa DILG servers, indikasyon na pwedeng kadakol na internal platforms an na-kompromiso.
Dugang pa kan Deep Web Konek, an domain na mahihiling sa screenshot na dilg.gov.ph an nagpapahiling na an data an direktang gikan sa government servers.
Sigun sa advocacy group, sinaysay kan #HappyGoLucky na an insidente an “hacktivism, not cybercrime for profit,” an dae ninda pigpapabakal o pigriribay an anuman na nakuang impormasyon.
Hurot pa soboot kan grupo, an saindang aksiyon an pangapodan kontra sa korapsiyon asin tanganing panimbagon an mga opisyal kan gobyerno na bigong magsirbi nin tama sa publiko.
