Ibinuyagyag ni Kalihim Jonvic Remulla kan Department of Interior and Local Government (DILG) na nagkakaigwa na nin negosasyon sa mga sinasabing protektor asin nagtatago ki Senador Ronald ‘Bato’ Dela Rosa.
Segun ki Remulla, aram ninda an kinamumugtakan kan Senador alagad nagpapadagos pa an negosasyon sa mga sinasabing protektor kaini.
Pigseguro man kan Kalihim na saindang maaarresto an puganteng Senador.
Poon pa kan Mayo, padagos an paghanap kan Philippine National Police (PNP) asin kan National Bureau of Investigation (NBI) sa Senador na igwang warrant of arrest hale sa International Criminal Court (ICC) huli sa pagkakasangkot kaini sa drug war kan panahon ni dating Presidente Rodrigo Duterte.
Huring nahiling an Senador kan Mayo 13 kun sain nag-atender ini sa sesyon kan Senado bago nagdulag pagkatapos kan nangyaring pamamaril sa laog kan Senate building.
