Pinahimutikan ni Department of Public Works and Highways Secretary Vince Dizon na igwa ining pagkahadit sa pagsusunad nin kaso kontra ki dating House Speaker Martin Romualdez — na pinsang buo ni Presidente Ferdinand Marcos Jr.
Pigrekomenda kan DPWH asin Independent Commission for Infrastructure (ICI) na kasuhan nin plunder, graft, asin direct bribery
si Romualdez, kaibahan si Ako Bicol Party List Representative Zaldy Co katakod kan saindang pagkakaimbwelto sa maanomalyang flood control project sa nasyon.
Sa plenary debates sa prosopwestong pondo kan DPWH para sa 2026, paramientras na sinuspinde an rules asin tinugotan si Dizon na direktang magsimbag sa mga kahaputan ni Senator Chiz Escudero.
Nahapot ni Escudero si Dizon kun nagkaigwa ba ini nin pagduwa-duwang isip o pagkahadit sa rekomendasyon magsunad nin kaso huli sa relasyon kan dating Speaker sa Presidente, hurot ni Dizon na malinaw an direktiba ni Presidente Marcos na sunodan sana an ebidensiya.
Hinapot man kan Senador an sekretaryo kun nuarin napagdesisyonang irekomenda an kaso kontra ki Romualdez.
Simbag ni Dizon, pirang semana antes sana kan makumpleto an dugang na dokumentos gikan sa DPWH, pati na an records kan Sunwest Corporation asin Hi-Tone Corporation, mga kumpaniyang pigkokonektar ki Zaldy Co.
Kaibahan man sa isinumiter na ebidensiya an sinumpaang testimonya ni dating Philippine Marines Technical Sergeant Orly Regala Guteza sa Senate Blue Ribbon Committee, sa ibaong kan isyu sa notaryo kan saiyang affidavit.
Mientrastanto, katakod kan kasong pigsunad ki Co, sinaysay ni Dizon na haloy nang inirekomenda kan ICI asin DPWH an pagsusunad nin kaso kontra ki Co katakod kan soboot iregularidad sa flood control projects sa Oriental Mindoro.
Sigun sa saiya, ini an nagin basehan kan enot na kasong pigsunad kan Ombudsman sa Sandiganbayan, na nagresulta sa pagluwas kan warrant of arrest kontra ki Co, nagkapirang opisyal kan DPWH, asin mga pribadong indibidwal.
