Aram baya nindo mga Ka-Bombo, mayo nin pinipiling oras asin bagay an mga kawatan.
Huli ta pati mga tukawan sa restaurant an mayong takas na pighahabon, huli man digde tulos na nagkasar an Spanish National Police asin binuwag an sindikato na eksperto sa paghahabon kan mga tukawan sa mga restaurant asin bar.
Digde na naarestar an anom na lalaki asin sarong babae huli sa paghahabon kan 1,100 na tukawan sa mga outdoor terraces sa Madrid asin sa karaning syudad kan Talavera de la Reina.
Sigun sa pulisya, nagpuon an sunud-sunod na harabunan sa mga restawran kan bulan nin Agosto asin nagpadagos hasta sa Setyembre. An modus kan grupo iyo an magsalakay sa pagkabanggi kun nuarin sarado an mga restaurant.
Target ninda iyo an mga tukawan na pigwawalat sa luwas. Dawa na ngani nakakadena an mga tukawan, hinabon pa man girary an mga ini sa paagi kan paglagadi.
Mapakol man sa pigkakarkulong 60,000 euros o labi sa 4 million piso an kantidad kan mga hinabon na tukawan. Sigun sa imbestigasyon, an mga hinabon na tukawan an dae sana pigpapabakal sa laog kan Spain.
An iba digde an ipinapadara asin pigpapabakal sa Morocco asin Romania. Nahahampang ngunyan an mga suspek sa kasong panghahabon asin pagsapi sa sarong criminal organization.
