Nagsunad an Commission on Audit (COA) nin apat pang fraud audit report sa Independent Commission for Infrastructure (ICI) na igwang koneksiyon sa P297 milyong kantidad kan maanomalyang flood control projects sa Bulacan 1st District Engineering Office.
Sinaysay kan COA na in-award an mga proyekto sa government contractors sa Wawao Builders asin SYMS Construction & Trading na nahilingan nin seryoso asin pauru-utrong sinyales nin salang paggamit kan kaban ng bayan.
Kaibahan sa na-flag na proyekto iyo an flood mitigation structures sa Barangay San Nicolas sa Hagonoy.
Pigtatao an nasambitan ng proyekto sa Wawao builders sa kantidad na labi P77 million.
Alagad, nadiskubre sa isinagibong inspeksiyon na mayong mga istruktura sa lokasyon kan proyekto maski pa ini an na-label na 100% kan kompleto sa papel.
Sa Wawao Builders man in-award an riverbank protection structure sa Barangay Iba, Hagonoy sa kantidad na P74 million na nadiskubreng sa ibang lugar ipinatindog.
Sigun sa COA, apwera sa dating DPWH Bulacan engineers, kaibahan sinda Henry Alcantara, Brice Hernandez asin Jaypee Mendoza, inilista man kan komisyon sa mga personalidad na igwang paninimbagan sa maanomalyang proyekto sinda Engrs. Ernesto Galang, Paul Jayson Duya, Jolo Mari Tayao, Mark Lester Castro, John Michael Ramos asin Rafaelito Marcelo, siring man sinda Wawao Builders’ General Manager Mark Arevalo asin SYMS Construction and Trading’s Sally Santos.
Ipinadara man kan komisyon an nasambitan ng reports asin rekomendasyon sa Office of the Ombudsman na nagsasagibong preliminary investigation tanganing maaraman kun masunad nin mga kaso sa korte.
