Pigpunahan kan Commission on Audit an Sandiganbayan huli sa mga iregularidad kan mga dokumento manungod sa nagastos sa mga overseas trips kan nagkapirang justices asin personnel, pati na an pag-organisa nin mga event sa nagkapirang four-star asin five-star hotel venues.
Segun sa nailuwas na annual audit report kan anti-graft court kan 2025, nadiskubre kan Commission on Audit na naaprubahan an liquidation kan “cash advance” na ginamit an P11,869,847.98 para sa foreign travels kan mga opisyales asin empleyado kan Sandiganbayan kan 2025, dawa na an mga ini mayong sapat asin kumpletong dokumento.
Segun sa COA report, nabanga ini sa pitong foreign trips, na kadaklan mga conferences asin training sa US state of Missouri; Victoria, Australia; Budapest, Hungary; Dubai, United Arab Emirates; Doha, Qatar asin Singapore poon Setyembre sagkod Disyembre kan 2025.
Nadiskubre man na an saro sa pinakamahal na foreign trips iyo an sa Hungary na nagkakahalaga nin P2.5 million, an sa Dubai na nagkakahalaga nin P1.88 million, mantang an Singapore trip nagkakahalaga nin P1.82 million.
Segun sa patakaran kan anti-graft court na sinambit kan COA, an presiding justice sana an may karapatan na mag-business class, mantang an iba pang mga empleyado pinapayagan sana na mag-avail nin official economy class, kun sakali na dai ini sasaguton kan host country o sponsoring organization.
